Habari/News

Nyalandu: Kigwangalla anatumika vibaya, Aunt Ezekiel aibuliwa tena

Tarehe November 14, 2017

Waziri wa Maliasili na Utalii, Mhe. Dkt. Hamisi Kigwangalla.

Saa chache baada ya Waziri wa Maliasili na Utalii, Mhe. Dkt. Hamisi Kigwangalla kuiagiza Taasisi ya Kuzuia na Kupambana na Rushwa (Takukuru) na vyombo vya ulinzi na usalama kuanza kumchunguza aliwahi kuwa Waziri katika Wizara hiyo, Mhe. Lazaro Nyalandu, aliyekuwa Mbunge huyo wa Singida Kaskazini ameibuka na kuelezea masikitiko yake akiona Waziri wa sasa akitumia muda ndani ya Bunge kumchafua, kumdhihaki na kumtungia uongo.

Haya yamejiri baada ya Dkt. Kingwangalla kumtuhumu Nyalandu kutumia madaraka yake vibaya wakati akiwa katika wadhifa huo katika Serikali ya Awamu ya Nne na kuikosesha Serikali mabilioni ya fedha.

Nyalandu amesema maneno hayo ni njama za makusudi zlizopangwa kumchafua baada ya kukihama Chama cha Mapinduzi (CCM) na kuhamia Upinzani na ili kuhakikisha kuwa hakuna mtu yeyote atakayethubutu tena kuihama CCM huku yeye akitumika kama mfano.

“Dkt. Kigwangalla anatumika vibaya kwa kauli za uongo dhidi yangu mara tu baada ya kuteuliwa kushika wadhifa huo hivi karibuni,” amesema Mhe. Nyalandu.

Akijibu moja ya hoja sita zilizoibuliwa na Dkt. Kigwangalla ya kuwa alitumia fedha za Serikali kusafiri kwenda nchini Marekani na Msanii wa Bongo Movie, Aunt Ezekiel, Nyalandu amesema habari hiyo ni ya uongo na  uzushi kwani ilichunguzwa na vyombo vya dola mwaka 2014 na kuthibitika kuwa ilitungwa ambapo katika mkutano huo uliofanyika Jijini Washington DC, alialikwa na Balozi wa Tanzania, nchini Marekani na kupewa ruhusa ya maandishi na Serikali kuhutubia mkutano huo kwa siku moja na kwamba wasanii wote walioalikwa, akiwemo Aunt Ezekiel hawakuwa na mwaliko wa Wizara ama Serikali bali waandaaji wa kongamano ndio waliowaalika na Serikali haikulipa gharama zozote kwao.

Kuhusiana na hoja nyingine ya Dkt. Kigwangalla ya kuwa Nyalandu alitumia helikopta inayomilikiwa na mwekezaji mmoja anayetuhumiwa katika biashara ya ujangili kugombea Urais mwaka 2015, Nyalandu amesema habari hiyo ni ya uzushi pia na kwamba waziri huyo atakuwa ama hana busara ambayo angepaswa kujiridhisha na taarifa kabla ya kuisoma bungeni au waliomtuma wamemuelekeza aisome hivyohivyo na kudai kuwa ukweli ni kwamba alipokuwa CCM aligombea katika kinyang’anyiro cha kuteuliwa ndani ya CCM kugombea urais na alitumia magari na ndege za kawaida kwa kulipa nauli ‘fixed wings’ pale ilipobidi hadi pale mchakato huo ulipoisha.

Aidha, ameongeza kuwa miaka yote akiwa Mbunge wa Singida Kaskazini amekuwa akifanya kampeni za kumalizia kwa njia ya helikopta na kwamba inawezekana Waziri Kigwangalla hajawahi kupanda helikopta katika maisha yake na kutaka kumjulisha kuwa usafiri huo ni kawaida sana kwake hasa pale inapombidi kufika katika baadhi ya maeneo jimboni kwake wakati wa kampeni za uchaguzi mkuu mwaka 2000, 2010, na 2015.

Majibu kamili ya Mhe. Nyalandu kwa Dkt. Kigwangalla ni kama alivyoandika;

“NYALANDU AMJIBU KIGWANGALA

INASIKITISHA sana kuona WAZIRI Kigwangalla akitumia MUDA wake ndani ya BUNGE leo kunichafua, kunidhihaki, na kusema UONGO na UZUSHI dhidi yangu, ikiwa ni NJAMA za makusudi zilizopangwa kunichafua mara baada ya mimi kukihama Chama Cha Mapinduzi -CCM. Aidha, hatua hiyo imepangwa kwa lengo la kuhakikisha kuwa hakuna kiongozi yeyote wa CCM atakayethubutu ama kudiriki tena kukihama Chama Cha Mapinduzi CCM katika Serikali hii ya awali ya tano. AIDHA, Waziri Kigwangalla anatumika VIBAYA, kwa kauli za UONGO na UZUSHI aliuanza DHIDI yangu mara tu alipoteuliwa, kwa kuanza kutoa kauli za kejeli dhidi ya UTUMISHI wangu uliotukuka ndani ya Wizara ya Maliasili na Utalii na wenye REKODI thabiti.

NIANZE na UZUSHI alioutoa Waziri Kigwangalla mapema leo BUNGENI, huku moyoni mwake akiwa anajua fika kuwa ametumwa kusema UONGO dhidi ya Waziri Nyalandu kwa lengo la kuandaa MAZINGIRA ya kumkamata na kubwa zaidi, kudhalilisha azma ya WATANZANIA ambao WAKO tayari kwa mabadiliko ya UONGOZI wa nchi kupitia UPINZANI. AIDHA, propaganda za Kigwangalla ameamua zimuhusu Waziri moja tu wa Maliasili, tangu TAIFA kupata Uhuru. Waziri huyu ni Nyalandu, ambaye wala sio Waziri ambaye yeye amemrithi alipoteuliwa kuwa WAZIRI, jambo linalothibitisha NJAMA na Progaganda za kuzimisha MOTO na nguvu ya umma kupitia UPINZANI, hasa baada ya kitendo changu Cha kukihama CCM.

1) WAZIRI Kigwangalla amekejeli kuwa Waziri Nyalandu alitumia Fedha za Serikali kusafiri USA na mwanadada Aunt Ezekiel. 
-HABARI hii ilikuwa ya KUZUSHA na ilichunguzwa na vyombo vya dola 2014 na kuthibitika ilitungwa na ilikuwa ya UONGO. Katika Mkutano huo wa Washington, DC, Waziri Nyalandu alialikwa na Balozi wa Tanzania, Marekani, na alipewa RUHUSA ya maandishi na Serikali kuhutubia Mkutano huo kwa siku Moja. Wasanii wote
Walioalikwa, akiwepo Mwanadada Aunt Ezekiel, hawakuwa na mwaliko wa Wizara ama Serikali, bali waandaji wa Kongamano. Na Serikali haikulipa gharama zozote kwao.(Mthibiti
Na Mkaguzi Mkuu wa Hesabu za Serikali anaweza kuthibitisha)

2) Waziri Kigwangalla amedanganya BUNGE kuwa Waziri Nyalandu alitumia helikopta kugombea URAIS 2015.
-Habari hii ni ya uzushi na UONGO, na Waziri atakuwa aidha hana BUSARA ambayo angepaswa kujiridhisha na Taarifa kabla ya kuisoma Bungeni, ama waliomtuma wamemwambia ASOME TU hivyo hivyo. UKWELI ni kuwa, Waziri Nyalandu, alipokuwa CCM, aligombea katika kinyang’anyiro cha URAIS kuomba kuteuliwa ndani ya CCM, na alitumia aidha usafiri wa MAGARI au NDEGE za kawaida kwa kulipa nauli (fixed wings pale ilipobidi), hadi mchakato ulipoisha kama uilivyoisha.
-AIDHA, miaka yote nikiwa Mbunge wa Singida Kaskazini, nimekuwa nikifanya kampeni za kumalizia kwa njia ya helikopta. Inawezekana Waziri Kigwangalla hajawahi kupanda helikopta katika maisha yake, nimjulishe TU kuwa kwangu huo ni usafiri wa kawaida sana na umesaidia ilipobidi kusaidia kufika baadhi ya maeneo Jimboni kwangu wakati wa Kampeni za Uchaguzi Mkuu 2000, 2005, 2010, na 2015.
-AIDHA, Mwaka 2015 nilitumia Helicopter kwa SIKU TATU za kumalizia Kampeni, na nilikodi helikopta hiyo kwa Sh milioni tano kwa siku (Jumla, milioni 15)
-Pia ingependeza kama hamaki za Kigwangalla zingemkumbusha kuwa Waziri Nyalandu akiwa Wizarani ALIPATIA Serikali Helikopta mpya Moja, alileta ndege kwa matumizi ya kupambana na Ujangili, Alishawishi Benki ya dunia, Ujerumani na USA kuleta mamilioni ya dola za kmarekani kusaidia mapambano hayo, na kwamba alifanikiwa Sana kutokmeza ujangili nchini. RAIS KIKWETE alikiri hili wakati wa kuzindua Tangazo la Tanzania (Tanzania, the soul of Africa).

3) Kigwangalla amezusha kuwa Waziri Nyalandu alitumia vibaya madaraka yake. Amezungumzia suala la Waziri Nyalandu kutotia sahihi TOZO mpya zilizopendekezwa na TANAPA. Jambo ambalo Waziri Kigwangalla angepaswa kulijua kabla ya kutoa kauli isiyo sahihi Bungeni ni kuwa SAKATA la TOZO za Tanapa lilijadiliwa BUNGENI mbele ya Spika Mama Anne Makinda, likiwa limeletwa na Kamati ya Lembeli, na kwa kupitia Wizara, Waziri Nyalandu alilitolea ufafanuzi na likamalizika na GN ilitolewa.
-SAKATA la kupandishwa ghafla kwa TOZO za mahotelini zinazojulikana kama (Fixed Rates) lilianza kabla sijawa Waziri. Aidha, kulikuwa na kesi Mahakama Kuu, ambako hadi kufikia mwaka 2012, uamuzi wa Mahakama uliyotolewa. Bado Nyalandu hakuwa Waziri. Aidha, nilipoteuliwa kama Waziri, Nikatazama SAKATA hilo ambalo lilishachukua muda mrefu sana hadi kufikia 2014, mimi nilipokuwa Waziri. Sheria inasema ”Concession Fees shall be 10% of half Board”, na kulikuwa
Na GN ya Serikali kuhusu TOZO hizo, takribani kuanzia mwaka 2002. Hukumu ya Jaji wa Mahakama Kuu ilielekeza kuwa TOZO zozote mpya ni sharti zipate GN mpya, na sheria ya msingi ilitaka TOZO ziwe kwa asilimia (percentage), na sio TOZO za kukisia, (fixed rate) ambazo ndio msingi mkubwa wa kupendeleana na rushwa katika kupanga nani alipe kiwango gani Cha kodi. Baada ya kuitolea maelezo Bungeni (na hansardi Zipo), Bunge na Wizara tulikubaliana namna ya kulimaliza na ndivyo ilivyofanyika na GN ilitolewa. Waziri Kigwangalla hajasema ukweli na amezusha kuhusu suala hili kwa sababu anazozijua mwenyewe.

4) Sakata la VITALU: Inasikitisha SANA na inatia AIBU kwamba Waziri atalihadaa BUNGE kwamba Waziri Nyalandu amehusika na kuuza VITALU au kugawa VITALU, na baya Zaidi kwa NJIA ya RUSHWA. 
-Sheria ya Wanyamapori inatamka wazi kuwa VITALU vitagawiwa kwa wawindaji kwa kila baada ya miaka MITANO. 
-Mara ya mwisho VITALU vimegawiwa Januari, 2017. Nyalandu hakuwa WAZIRI. (Waziri alikuwa Mh. Prof Maghembe)
-Kabla ya hapo, VITALU viligawiwa mwaka 2013. Nyalandu hakuwa Waziri. (Waziri alikuwa Mh Maige)
Hii ni AIBU sana na natumaini kwa Waziri Kigwangalla na wanaomtuma wangetamani sana miaka ibadilike ili isomeke Waziri Nyalandu.

5) Waziri Kigwangalla amedai kuwa Waziri Nyalandu alikuwa anafanyia Kazi katika Chumba maalumu katika hoteli ya Serena. Naomba Waziri Kigwangalla, athibitishe ni Chumba namba ngapi, na wahusika wa hoteli pia wathibitishe. Kama Waziri, nilifanya Kazi katika ofisi yangu iliyopo Wizaranya Maliasili na Utalii. Kigwangalla pia akumbuke mimi nilikuwa MTEULE wa Rais ambaye alikuwa na vyombo vya kumsaidia kusimamia Mawaziri.

6) Mbwembwe hizi na kusingiziwa kunakofanywa kwa makusudi baada ya mimi Nyalandu kukihama CCM ni aibu kwa TAIFA na ni matumizi mabaya sana ya MADARAKA. Aidha, ifahamike kuwa Vitisho na njama dhidi yangu na familia yangu kunakofanywa na wote wanaohusika hakutazimisha azma ya watanzania kutaka mabadiliko ya kweli nchini. Imeandikwa, WAONGO wote, sehemu yao ni katika ziwa liwakalo moto kwa kiberiki. Haki huinua Taifa, na uonevu na dhuluma ni dhambi itakayowatafuna wahusika siku zote za Maisha yao.

—� —�—� —�—
Lazaro S. Nyalandu.”

 

Email this page

To:
From
Subject
Message
Code

Maoni